Հայ սամբիստները 8 մեդալ են նվաճել Եվրոպայի առաջնությունում

Հեղինակ՝ Nairi Manukyan

Լիմասոլում (Կիպրոս) ավարտվել է Եվրոպայի սամբոյի պատանիների, երիտասարդների և մեծահասակների առաջնությունը: Աշխարհամասի 26 երկրի ուժեղագույն սամբիստների պայքարում Հայաստանի ներկայացուցիչները նվաճել են 8 մեդալ՝ մեկական ոսկե և արծաթե, 6 բրոնզե:

Եվրոպայի երիտասարդական առաջնության ոսկե մեդալակիր է դարձել Դավիթ Հովսեփյանը: 58 կգ քաշային կարգի չեմպիոնական գոտեմարտում Հովսեփյանը, որը ծննդով Շուշիից է, հաղթել է ադրբեջանցի Նիջատ Մամադլիին: Երիտասարդների առաջնությունում մրցանակակիր է դարձել նաև Ռուզաննա Բալասանյանը (50 կգ)՝ արժանանալով բրոնզե մեդալի:

Մեծահասակների պայքարում Արթուր Հակոբյանը (79 կգ), Արմեն Մնացականյանը (58 կգ), Արամ Աղաջանյանը (64 կգ) ևս դարձել են բրոնզե մեդալակիրներ, իսկ Մհեր Մերջանյանը (71 կգ) կանգնել է պատվո հարթակի երկրորդ աստիճանին (վերջին երեքը՝ մարտական սամբո): Պատանիների պայքարում էլ բրոնզե մեդալ են նվաճել Մեսրոպ Նիկոյանը (64 կգ) և Սյուզաննա Կիրակոսյանը (50 կգ):

Նշենք, որ առաջնություններն անցկացվել են նոր քաշային կարգերով և մրցավարական նորացված կանոններով՝ համաձայն ՄՕԿ-ի (Միջազգային օլիմպիական կոմիտե) պահանջների, ինչը պարտադիր է սամբոյի՝ օլիմպիական մարզաձև դառնալու համար:

0 Մեկնաբանություն
0

Թողնել մեկնաբանություն